ڈیرہ اسماعیل خان میں انٹیلی جنس آپریشن، 13 بھارتی سرپرست دہشت گرد ہلاک

نمائندہ انسائیڈ پاکستان کے مطابق ڈیرہ اسماعیل خان کے علاقے ڈرابن میں سیکیورٹی فورسز نے انٹیلی جنس معلومات کی بنیاد پر کامیاب آپریشن کیا جس میں 13 بھارتی سرپرست دہشت گرد ہلاک ہوگئے۔ یہ کارروائی آج علی الصبح حساس اداروں کی اطلاع پر کی گئی۔

فوج کے شعبہ تعلقات عامہ (ISPR) کے مطابق، ہلاک دہشت گردوں کا تعلق بھارتی پراکسی گروپ “فتنہ الخوارج” سے تھا۔ آپریشن کے دوران دہشت گردوں کے ٹھکانے کو نشانہ بنایا گیا جبکہ فائرنگ کے تبادلے میں ہتھیار اور گولہ بارود بھی برآمد ہوا۔

سیکیورٹی حکام نے بتایا کہ ہلاک دہشت گرد مختلف تخریبی کارروائیوں میں ملوث تھے جن میں دسمبر 2023 میں ڈرابن میں ہونے والا خودکش حملہ، سرکاری اہلکاروں اور عام شہریوں کے اغوا اور ٹارگٹ کلنگ جیسے سنگین جرائم شامل ہیں۔

نمائندہ انسائیڈ پاکستان سے گفتگو میں ایک اعلیٰ فوجی افسر نے کہا کہ “یہ کارروائی بھارتی سرپرستی میں چلنے والے دہشت گرد نیٹ ورکس کے خاتمے کی طرف ایک بڑا قدم ہے۔ ہماری فورسز ملک دشمن عناصر کو جڑ سے ختم کرنے کے لیے پرعزم ہیں۔”

علاقے میں تلاشی کا عمل (Sanitization Operation) جاری ہے تاکہ ممکنہ طور پر چھپے ہوئے دیگر دہشت گردوں کو بھی گرفتار یا ہلاک کیا جا سکے۔ فوجی حکام نے واضح کیا ہے کہ پاکستان کی سیکیورٹی فورسز ملک سے بھارتی سرپرستی میں ہونے والی دہشت گردی کو ہمیشہ کے لیے ختم کرنے کے لیے پرعزم ہیں۔

سورس: ریڈیو پاکستان
نمائندہ: انسائیڈ پاکستان